BUDAYA

KENDURI

      Kendhuri (uga asring kasebut kendhurèn lan kondangan) iku sejatiné upacara slametan utawa syukuran. Yèn ana wong Jawa kang nduwé khajatan, biasané ana kendhuri amarga sing diarep-arep wis kaleksanan lancar lan aman, utawa ndedonga amrih olèh kaslametan nalika arèp ngayahi sawijining lelaku sing wigati. Acara iki biasané dadi rangkéyaning acara kelairan, khitanan utawa pernikahan. Kendhuri acara pernikahan saiki umumé uga diarani resèpsi.

Acara utama jroning upacara kendhuri yakuwi arupa ritual ndedonga marang Pangèran Kang Maha Kuwasa supaya diparingi kaslametan, karahayon tumrap sing kagungan kersa sumrambah marang kabèh para rawuh. Kanggo wong Islam ing acara iku biasané padha maca Surah Yasin.

Sing diundhang ing acara kendhuri umumé kerabat utawa sedulur, tangga tepara, kanca lan wong liya sing dikenal, lan sing diundhang umumé bapak-bapak utawa wong lanang. Yèn ibu-ibu uga diundhang, biasané wektuné dipisah. Ing kutha gedhé, undhangan kendhuri umumé dicampur antarane bapak-bapak lan ibu-ibu.

Sing disuguhaké jroning acara kendhuri biasané arupa panganan tradhisional, ing antarané sega kuning, jajan pasar lan liya-liyané. Jaman saiki suguhan kendhuri ditata ing sakdhuwuring méja sing amba. Yèn kendhuriné wis rampung, tamu-tamu sing rawuh umumé dibekeli bèsèk utawa berkatan sega kendhuri.